Finanzen

Nun ist bereits einige Zeit vergangen seit unserem Einsatz in Bulgarien. Wir alle haben in den letzten vier Monate ganz viele Dinge erlebt, die Zeit in Bulgarien dabei aber nicht vergessen.

 

Auch in Cherven Brjag ist die Zeit nicht stehen geblieben. Kurz nach unserem Einsatz hat die lokale Kirche vor Ort ein Kinderprogramm im Stadtpark durchgeführt, wo unser Spielplatz rege benutzt wurde. Darüber freuen wir uns sehr!

 

In dieser Zeit konnten wir auch alle Rechnungen und Reisekosten begleichen und die Schlussabrechnung machen. Dabei ist uns vor allem etwas aufgefallen: Ihr seit extrem grosszügig gewesen mit euren Spenden! Dafür möchten wir dir von ganzem Herzen danken*!

 

Nun haben wir sogar mehr Geld gespendet bekommen als wir ausgegeben haben. Wir konnten während zwei Vorbereitungsreisen und dem Einsatz selber diverse Hilfswerke kennen lernen und Kontakte knüpfen. So werden wir nun das übrig gebliebene Geld an folgende Institutionen spenden:

 

Dazu unterstützen wir mit kleineren Beträgen lokale Kirchen, die sich in ihrer Ortschaft und in der Flüchtlingsbetreuung sozial engagieren.

 

Wir sind überzeugt, dass das gespendete Geld bei diesen Institutionen gut eingesetzt wird und dazu beitragen wird, dass in Bulgarien Freude und Liebe in arme Verhältnisse getragen werden kann.

 

Liebe Grüsse, 

Das OK-Team (Sel, Tabi, Sämu, Dävu)

 

 

 

*Eine kleine Bemerkung zu den Beiträgen: Um beim Einsatz teilzunehmen war kein fixer Teilnehmerbeitrag abzugeben (nur ein symbolischer Beitrag von höchstens 50.- CHF). So konnten wir sicherstellen, dass niemand aus Kostengründen nicht teilnehmen konnte! Das hat natürlich auch finanzielle Risiken mit sich gebracht. Und doch ist ein grosser Teil der Kosten durch Spenden der Teilnehmer selbst zusammengekommen. Das hat uns extrem gefreut! Danke vielmals dafür! Wir danken aber auch allen Verwandten, Freunde und anderen Unterstützer für die grosse Beteiligung. Wir glauben, dass wir durch dieses Projekt dem Dorf Cherven Brjag und viele andere Beteiligten die Liebe und Freude von Gott in teils trostlose Situationen hineinbringen konnten. Auch uns selber hat dieses Projekt verändert. Das war unser Ziel, Gott hat es bewirkt und du hast dies mit deiner finanziellen Spende unterstützt! Möge Gott es dir vergelten!

 

 

Rückblick auf das Projekt

Tagebuch

06.08-07.08.

 

Iz auso geit di Reis em Ändi entgägä. Mir hei aui ungbloublech viu erläbt u ja, ds Projekt wo mir agfange hei, geit in Cherven Bryag witer.

 

Am Mänti morge si es paari no ga bade, di angere is Pärkli in Burgas. Nachemne flüchtige Mittagässe hei mir üses Züg i d’Outo packt und si losgfahre nach Sofia. Nach es paar chlinere Outoproblem (pladi, Öldrucklämpli am brönne, Bremsflüssigkeitsknappheit) si mir de guet und oni grossi Schäde in Sofia acho.

 

Mir si so ines «Socialhouse» ga übernachte wo dr Ivodor füert. Dert biete si Musigsschueu, Schueu, Tanze, Ässe und angers ah für Flüchtlinge, armi Lüt ir Nachbarschaft und o Ex-Gfängnisinsasse. I däm Huus si aso auii die Schueurüm, e Chiuche und e Café.

 

Dr Ivodor het verzeut was si i däm Huus aues mache und o das är e Gottesdienst i Gfängnis ahbietet, wo är scho rise Wunder erläbt hei. So het är scho oft xeh wi Schwärkrinminelli vo Gott si berüert und grundlegend veränderet worde.

 

Am Zisti  simer de am viertu vor Füfi ufgstange u när mit de Taxi a Flughafe, wo mir am haubi achti dr Flug hei gha. Ufene Wäg simer sicher o froh widr deheime z’si, aber es isch haut eifach o e schöni zit xi mit kuule Lüt u vilne Erläbnis mit Gott. Drum simer gloub o auii chli truurig dases verbi isch….

 

04.08.-05.08

 

Mir wohn im Gmeindehus vor Gmeind in Burgas. Da si zweni Platz hei für d’Gmeind, hei si iri Gottesdienste im Theatersau.

 

Am erste Tag (Samstig) simer chli usserhaub vor Stadt a Strand gfahre und hei dr ganz Tag gsünnelet und badet. So zimlech auii hei sich es bitzli verbrönnt. Am Aabe simer ines Matrose-Restaurant u hei spennendi Diskussione gha. U när simer nach somne richtige Strandtag völlig erschöpft heicho und auii si sofort igschlafe.

 

Gweckt worde si mr am Sunti wi di angere Täg vo lachende Möwe. När simer i Gottesdienst in Burgas. Das isch es spannends Erläbnis xi, obwou mir praktisch nüt verstande hei. Dr Worschip isch sehr Musikalisch, aber o sehr luut xi. Am Schluss vom Lopris hei mir aus JG no s’Lied «Wunderbari Gnad» gsunge und erklärt wieso mir hie si und was mir i dr letschte Wuche erläbt hei. Nachemne Mittagässe im Park hei mir no e Rundi gmacht wo mir ustuschet hei wi mir di Ziit in Cherven Bryag so erläbt hei. S’Fazit dervo:

 

  • Gott isch guet und het üs genau a däm Ort brucht für sis Riich z’boue.
  • We mir muetig si, de steit är üs o bi und hiuft üs bi aune Hindernis wo dermit chöme.
  • Mir si überwäutiget was fürnes Potential a verschidnige Gabe i dr JG vorhande si und das Projekt het zeigt, dass jede sini Gab für Gott cha isetze.

 

 

 

 

02.08.2018 - Fest
Es si so viu Lüt cho us dr Stadt und de umligende Dörfer. Dr Spiuplatz isch offizieu eröffnet worde. Lüt vom Fernseh si cho u hei dr Sam interviewt. När hets no drü rede gäh: Dr Vesko het xeit was das Projekt so isch und wär mir si. Dr Sam het di vier Pünkt erklärt (www.thefour.com) und xeit, das mir ine dä Spiuplatz sehr gärn schänke und när het no e Frou vor Stadtverwautig es paar Wort verlore. Zwöi Ballönbünd (Eine i de Farbe vor Schwiz und eine i de Farbe vo Bulgarie) si dürschnitte worde und auii Ching si ufe Spiuplatz gstürmt. D'Belastigsprob het dr Spiuplatz ämu bestange.
Auii hei a däm Abe so Fröid gha. D'Atmosphäre isch Himmu uf Ärde xi. Es het auii Vorstellige totau übertrumpft. Mega viu Ching u o Eutere si üs cho danke und hei üs xeit wi viu Fröid si hei und das mir unbedingt wieder söue cho. Verschiednigi hei Föteli mit üs wöue mache und sehr vili hätte gärn es Gsamtfoto vo üs aune gha. D'Lüt (v.a. d'Ching) hei chöne Büchseschiesse, Chegle, Ässe, s'Gsicht la bemale, zeichne oder eifach si. Mir si mitem Ziu gange d'Liebi vo Gott z'verschänke und gloub genau das isch passiert - und säuber heimr ono so viu zrüggübercho.

Öpe am Nüni isches de verbi xi... mir hei no es Foti gmacht mit aune und no no Gschänkli vo de Lüt vor Schwiz übercho. När hei mir ine ono Toblerone und Sackmässer gschänkt. Dr Pastor vo dert het xeit, dases scho immer si troum sig xi es Schwizer Sackmässer zha, drum het är mega Fröid gha.

Bim Znacht si de auii mega müed xi. Wo mir när no am Personal vom Hotel hei es Gschänkli gä, het das z'Personau mega berüert u d'Träne si gflosse. Si hei üs xeit dases si mega berüert was mir für die Stadt tüe. So het dä läng, emotional und erreignisrich Tag ono es Ändi gnoh! 

02.08.2018
Mir hei no di letschte Verbesserige am Spiuplatz müese mache. Am Mittag isch dr Spiuplatz fertig worde u mir hei fasch nid chöne warte fürne z'eröffne. Mir hei nä mit dene Farbe müese bemale wo üs d'Stadtverwautig het vorgäh. Iz xehter sehr bunt und schön us. Es isch dr schönst Spiulatz im Stadtpark. Derzue hets no es Schiud gä wo dr Name vom SPiuplatz "Quelle vom Leben" drufesteit und das är vo Ching zwüsche 12i und 18i cha benützt wärde.
Die vier Pünkt, d'Website www.thefour.com und e Schwizer- und Bulgariefahne si druf gmale. Zum Zmittag het dr Nick (Bulgar wo in Holland studiert und perfekt änglisch cha) bulgarische Fingerfood mitbracht wo sehr fein isch xi. So Fleischbäueli und Brot und ono es feins Gebäck. Am Nami heimr es Chinderprogram gmacht wi a de vordere Namitäg. Mir hei mit ine so Spili gmacht wi Mischka-Kotka (Chatz-Muus), Lumpelege, Ziitigläse, Sitzbau, Zeichne/Baschtle, Chlämmerlispiu, Pack-den-Schwanz, blindi Chueh, Cowboy-Game u no vili meh.

01.08.2018

Mir hei am Abe e Schatzsuechi gmacht mit de Ching. Drum hei mir am Morge wos no keni Ching het ga dr Schatz vergrabe. D'Ching hei s'Chinderprogram wider sehr gnosse. Si kenne d'Spiu langsam u versöh üs meh oder weniger. Si hei am Abe guet zueglost bir Gschicht u Fröid a dr Pantomime gha.
D'Schatzsuechi het ine o Spass gmacht u si si aktiv derbi gsi. Während der Suechi hei mir si no mit Wasserballön überfaue und e Wasserschlacht agfange. D Schoggi im Schatz heisi o sehr fein gfunge.
Dr Spiuplatz isch mittlerwile scho rächt farbig. Es brucht doch grad chli meh Zit aus mir dänkt hei bis dr ganz Spiuplatz schön agmale isch. Mitem einte Spiuturm und dr Schoukle hei mir chli Problem gha und mir hei no zimlech müese improvisiere. So ischs sehr praktisch das mir hie mittlerwile viu Lüt kenne wo üs zum Bispiu Schweissarbeite hei chönne erledige.
Nachem ufrume simer ga znacht ässä im Hotelrestaurant. Es si no es paar Lüt vor Gmeind vo Cherven Bryag zu üs cho ässe. Nachem Ässe hei mir no mitenang Gott abätte uf Bulgarisch, Änglisch und Schwizerdütsch. Zum Abschluss hei mir no d'Nationalhymne gsunge...es isch ja schliesslich dr 1. Ougust gsi.

31.07.2018


Hüt isch e super Tag xi! Zersch mau: ke Räge.
2.: D'Chinder si scho viu zuetroulecher xi u hei mega Fröid gha am Programm.
3.: Bim Spiuplatz si d'Bouer scho sehr vorwärts cho.
4.: D'Organisation/Iteilig isch viu besser glofe, jede het sis Jöbbli gha.
5.: Z'Klima ir JG isch sehr agnähm.
6.: Jede het dr Tag meh oder weniger gnosse.

 

Es paari si mitem Hansueli es Ehepaar ga bsueche wo vor AVC ungerstützt wird und hei dert iri Gmeind und ire Second-Hand-Shop chöne kennelehre.
Am Aabe isch dr Vesko und d'Eli cho (Das isch das Pastore Ehepaar wo s'meiste für üs vor Ort organisiert het) und hei üs us irem Läbe verzeut. Si hei voraum betont, dasses mega wichtig isch, dass d'Gmeind nid da isch für sich säuber z'häufe, sondern für dene usserhaub vor Gmeind.
Das hie si mega längi Täg. Z Chinderprogramm geit vom 6i bis am 8i wüus denn am meiste Ching het u de gits immer ersch nächhär Znacht.
Das Projekt schint e grossi Ufmerksamkeit ufsech z'zieh. Ir Stadt kenn üs wahrschinlech scho zimlech aui Lüt. Ou ire nationale Zitig het dr Bürgermeister üse Flyer irgendwie abdruckt - wieso wüsse mir o nid gnau. Iz simer gspannt wiviu Lüt am letschte Tag chöme und vorauem wi viu Lüt de a z "Iweihigsfest" am Donnsti chöme.

30.07.2018
Z'zmorge isch hüt rächt fettig u fuerig xi, aber sehr fein. Entweder hetme Fotzuschnitte mit Honig gha oder e süesse Maccaronigratin.
Itz si mir hie ufem Platz, wo dr nöi Spiuplatz wird entstah. Es steit no e aute, chline druffe wo wägtrage wird. No chöimr nid afah mit üsem Programm, wüu mir uf d'Lüt vor Regierig hie müese warte. Zur Ungerhautig mache es paari so Tierli us Ballonschlüch.
S'Warte isch de zumne Ändi cho, wo di erschti Brügiwäge mit üsem Boumaterial si cho und s'Boue het chöne afah.

Am Namitag hei mir de agfange mit de Ching spile. Mir hei vorauem aktivi Spiu gmacht womer di ganz Zit umegsecklet si. Mir si gloub schneuer müed worde aus d'Ching. Plötzlech hets e Platzräge gä u da si aui irgendwo häre verschwunde. Chum isch dr Räge verbi xi, si de o d'Ching schnäu widr da xi.
Am Abe si d`Ching sehr wiud xi. Es isch nid sehr eifach xi aune e Gschicht z'verzeue! Nach dr Gschicht hei d'Ching chöne T-Shirts bedrucke. O das isch zimlech wiud zue und härgange. Aber auii hei mega Fröid gha und o mit dr Mengi und de Grössine vo de T-Shirts isches zimlech guet ufgange. Üse Vorrat a 4-Punkte Bändeli (eigentlech für di ganzi Wuche dänkt) isch natürlech scho innerhaub vo es paar Minute usgange.
O dr Spiuplatzbou isch schnäu vorwärts gange. Am Achti isch no es Ehepaar cho wo sech füre Gmeindebou in Bulgarie isetzt und het chli verzeut was si vorauem im Südoste vo Bulgarie so mache. Är isch e Bulgar und si e Dütschi. Ihne heimr o grad üsi Frage chönne steue wo mir über Bulgarie (d Kultur, d Gschicht, d Politik usw) hei gha. Nachere interessante Stung hets es späts aber feins Znacht gä!



29.07.2018
Am Sunti si mir nachem Zmorge grad i d'Church gange. Wow, auii hei mit gaaanzem Härze gsunge. Mir hei uf Dütsch oder Änglisch, si uf Bulgarisch. Dr Michu und dr Sam hei bi aune Lieder begleitet, egau öb sis kennt hei oder nid. Auii lüt si mega härzlech xi und hei mega Fröid gha das mir si verbi cho. Nach dr Predigt het üs dr Theo (Pastor vo dere Church) so es paar Höhline zeigt. Di si sehr schön xi, sehr höch u breit. Ir Mitti hets zwöi riise Löcher gha wo d'Sunne inegschune het. Dr Theo het si Dudelsack mitgnoh u wäg dr guete Akkustik Fröid gha z'spile.
Nächhär hei es paar no e chlini Wanderig gmacht wome zumne sehr schöne Ussichtsplatz isch cho. Bir Heifahrt heimr no e Töff xeh am Bode lige mitemne Fahrer näbedran. Womer kehrt hei het sech usegsteut, dass är dert ufem Töff am Bode e Nuck het gnoh.

Mir si auii verschwitzt im Hotel acho und hätte gärn e Duschi gnoh, aber - tada es het ke Wasser gäh. So simer de afang ga znacht ässe. U plötzlech bim Znacht hets gheisse: Auii ga Wasserhäne zueträie wüu s'Wasser geit widr und i paarne Zimmer überloufts wüu mir se us versehe hei offeglah.

 

28.07.2018

Mir si am Flughafe; 26 Jg-ler u warte ufe Flug. D'Fahrt dahäre isch rächt früech losgange, für die einti chli vor- und für di angere chli nachem sächsi.

Mir si auii chli nervös u gspannt wi dä Isatz wird.

Mitem Flug het aus bestens klappet. Womer usem Flughafe chöme, de chunt üs e Hitz entgäge. Nachdäm dasmr dür Passkontroue gange si, heimr s'erste mau chönne Geduud üebe. Mir hei ca. ei Stung uf üsi drü grossi und auti Outos müese warte. Die Outos si auii übrigens ir schwiz brucht worde und när über AVC nach Bulgarie gschickt worde.

I eim vo de  Outo heimr no müese Bremsflüssigkeit nachefüue. Nach dem si mir ca. einehaubstung richtig Norde nach Cherven Brjag gfahre. Üses Zmittag (öpe am haubi füfi) heimr de ufemene Lidl Parkplatz gnoh. Im Hotel acho heimr scho gmerkt dases da chli angers isch: Loch ir Tili, WC-Spüelige wo nid so würklech funktioniere und v.a. sehr viu Bürokratie bir Amäudig! Ds Hotel würd eigentlech grad renoviert wärde, aber si heis extra für üs uftah, drum simer wahrschinlech o während der ganze Zit alei.

Nach däm das mir auii das Amäudigsformular nach langer Zit doch noch richtig hei chönne usfüue, hei mir chöne ga ässe. Das isch sehr fein xi. Nachem ässe simer no ga d'Chiuche und dr Stadtpark luege wo mir när de dr Spielplatz wei boue.

So, nun freuen wir uns unsere Idee endlich in die Tat umsetzen zu können. Wir starten am nächsten Samstag um 5:50 Uhr am Bahnhof Bern in das Abenteuer. Wir halten euch hier auf dem Laufenden...